Кырчында 90 бейтапка ылайыкталган мобилдүү госпиталь даярдалды
VI Дүйнөлүк көчмөндөр оюндары өтө турган Кырчын жайлоосунда Өзгөчө кырдаалдар министрлигинин мобилдүү госпиталы жайылды. Бул тууралуу ӨКМден билдиришти.
Мобилдүү госпиталь 21 унаадан жана 31 чатырдан турат. Анда хирургиялык операция жасоочу жай, УЗИ жана рентген аппараттары, лаборатория, реанимобиль жана мобилдүү дарыкана каралган.
Госпиталь күнүнө 150 бейтапты амбулатордук кабыл алууга, 20га чейин хирургиялык операция жүргүзүүгө жана 90 бейтапты жаткырып дарылоого ылайыкталган. Ошондой эле сегиз орундуу интенсивдүү терапия бөлүмү бар.
Учурда Кырчын жайлоосунда ӨКМдин Апааттык медицина кызматынан 20, Саламаттык сактоо министрлигинен 60 дарыгер иш алып барууда.
Мындан тышкары, мобилдүү госпиталдын курамында сууну чыпкалоочу жана абаны тазалоочу станциялар, жуунуучу жай бар.
Коопсуздукту камсыздоо максатында Кырчын жайлоосунда ӨКМдин эки тик учагы да нөөмөткө коюлат.
Дүйнөлүк көчмөндөр оюндарын коопсуз өткөрүү үчүн ӨКМдин куткаруучулары күчөтүлгөн тартипте иштөөгө өттү. Ошондой эле тиешелүү аймактарда өрт өчүрүүчү жана авариялык-куткаруу унаалары, катерлер нөөмөткө коюлду.
