К.Ташиев: "Чүйдө 100дөн ашык объект, 2025-жылы 12 миң гектардан ашык жер мамлекетке алынды"
УКМК төрагасы Камчыбек Ташиев Кемин шаарында жаңы төрөт үйүнүн имаратынын курулушуна мезгил кутусун салуу иш-чарасында Кыргызстанда коррупция жана уюшкан кылмыштуу топторго каршы күрөш жөнүндө сүйлөп, бул жаатта Чүй облусунда аткарылган иштер тууралуу маалымат берди.
Камчыбек Ташиев 2023-жылы УКМКнын атайын операциясында жок кылынган кримтөбөл Камчы Көлбаевге (Камчыбек Асанбек) тиешелүү 30 млн долларга бааланган 850 батир мамлекетке кайтарылып, элге ипотекага берилип жатканын айтты. Чүй облусунда убагында ар кандай жол менен жеке колго өтүп кеткен 100дөн ашык объект, 2025-жылы эле 12 миң гектардан ашык жер мамлекетке алынганын кошумчалады.
“Аю Холдингинин” ээси Шаршенбек Абдыкеримовдун Аламүдүн районунда жайгашкан 300 гектар жери жана 100 млрд сомду түзгөн мүлкү мамлекетке кайтарылды. Бул акыркы жылдары биздин жасаган иштер. Мен Чүй облусу боюнча гана айттым. Башка жерлерде мындан да көп талап-тоноолор болгон”, - деди Камчыбек Ташиев.
