Чүй облусунда жол боюндагы мыйзамсыз 12 соода объектиси демонтаждалды
Чүй облусунда жол боюндагы мыйзамсыз жайгаштырылган 12 соода объектиси демонтаждалды. Иш-чаралар 17–19-февраль күндөрү Бишкек – Кара-Балта автоунаа жолунун Москва району аймагындагы тилкесинде жүргүзүлгөнүн Курулуш министрлигине караштуу Мамлекеттик архитектуралык-курулуш көзөмөл департаментинин Чүй облустук башкармалыгынан билдиришти.
Иш-чаралар Шаар куруу жана архитектура департаменти, ошондой эле Москва районунун жергиликтүү өз алдынча башкаруу органдары менен биргеликте өткөрүлгөн.
Рейддин жүрүшүндө мыйзамсыз деп табылган 12 убактылуу соода түйүнү жана жеңил курулуштар буздурулду.
Маалыматка ылайык, демонтаж иштерине бир жума калганда объектилердин ээлерине аймакты тартипке келтирүү жана мыйзам бузууларды жоюу талабы коюлган эскертмелер берилген. Ошондой эле ишкерлер менен түшүндүрүү иштери жүргүзүлгөн.
Мекемеден белгилешкендей, Чүй облусунун аймагында курулуш иштеринин жүрүшүнө жана сапатына көзөмөл туруктуу негизде улантылат. Курулуш ишмердүүлүгүнүн субъекттерин курулуш нормаларын жана техникалык коопсуздук талаптарын так сактоого чакырышты.
