Кайсы учурда мүлккө салык милдеттүү болот?
Батирдин аянты 80 чарчы метрден, ал эми жеке турак үйдүн аянты 150 чарчы метрден ашкан учурда гана мүлк салыгы эсептелет. Бул тууралуу Мамлекеттик салык кызматынын төрагасынын орун басары Мирлан Рахманов “Кабардагы” маалымат жыйында билдирди.
Анын айтымында, мисалы, аянты 200 чарчы метр болгон жеке үйдүн 150 чарчы метри салыктан бошотулуп, калган 50 чарчы метри үчүн гана төлөм алынат. Мындай учурда жылдык салык болжол менен 3 миң 339 сомду түзөт.
Рахманов белгилегендей, салык төлөөчүлөр болуп ишкердик жүргүзгөн жеке жана юридикалык жактар, ошондой эле өз атына катталган мүлкү же жери бар жарандар эсептелет. Бирок бардык жарандар эмес, дал ушул мүлкү бар адамдар гана жылына бир жолу төлөнүүчү салыкка тартылат.
Ошондой эле батир же үйдөн тышкары кошумча жер тилкеси болсо, ага да тиешелүү салыктар каралары айтылды.
