Курулушчулар үлүшчүлөр тууралуу маалыматты беришпесе чара колдонулат – А.Шыкмаматов.

Мамлекеттик салык кызматынын төрагасы Алмамбет Шыкмаматов курулуш тармагынын өкүлдөрү менен болгон жолугушууда үлүшчүлөр тууралуу маалыматтарды алуу боюнча ведомствонун позициясын кескин билдирди.

Ишкерлер жарандык кийимчен келип, соттун чечими жок эле кардарлардын тизмесин талап кылган инспекторлорго даттанышкан. Буга жооп кылып, Салык кызматынын башчысы ишкерлерди юридикалык талаш-тартыштарга барбоого чакырды. Анын айтымында, маалыматты жашыруу же документтерди берүүнү создуктуруу маанисиз, анткени Салык кызматында жетиштүү таасир этүү механизмдери бар.

Эгер курулуш компаниялары маалыматтарды ыктыярдуу берүүдөн баш тартса, Салык кызматы күч түзүмдөрүн тартат.

Ал белгилегендей, ведомство ИИМге кайрыла алат, анда документтерди алып коюу бизнес үчүн кыйла ыңгайсыз шартта жүргүзүлөт. "Жөн жерден талашуунун кереги эмне? Жөн эле папканы бергиле", — деди ал, мамлекеттик органдар кандай болгон күндө да керектүү маалыматтарды ала турганын кошумчалап, бизнес үчүн ачыктык пайдалуураак экенин белгиледи.

Курулушчулардын коммерциялык сыр жана кардарлардын жеке маалыматтарын коргоо боюнча тынчсыздануусуна жооп кылып, Шыкмаматов ведомство маалыматтын коопсуздугу үчүн толук жооп берерин айтты. Анын сөзүнө караганда, кызматта катуу көзөмөл бар жана кызматкерлер одоно мамиле же ыйгарым укуктарын ашыра пайдаланганы үчүн дайыма тартиптик жазага тартылып турушат.

Эгер салыктык сыр үчүнчү жактарга же атаандаштарга чыгып кетсе, ал кызматтык иликтөө жүргүзүлүп, күнөөлүүлөр жазаланарын убада кылды.

Ошол эле учурда, Салык кызматынын төрагасы айрым процессуалдык талаптарды сактоо зарылдыгын моюнга алды. Ал инспектор сөзсүз түрдө райондук башкармалыктын жетекчиси кол койгон расмий суроо-талапты көрсөтүшү керектигин белгиледи. Анда текшерүүнүн негиздемеси — камералдык, көчмө же пландан тышкаркы текшерүү — так жазылышы зарыл.