Максым даярдоо салттуу ыкмасы ЮНЕСКОнун маданий мурастар тизмесине кирди
Кыргызстандын улуттук суусундугу болгон максым даярдоонун салттуу ыкмалары ЮНЕСКОнун адамзаттын материалдык эмес маданий мурастарынын репрезентативдүү тизмесине расмий түрдө киргизилгенин ЮНЕСКО иштери боюнча КРнын Улуттук комиссиясы билдирди.
Маалыматка ылайык, чечим 2025-жылдын 10-декабрында, Индиянын Нью-Дели шаарында 8–13-декабрда өтүп жаткан Материалдык эмес маданий мурастарды коргоо боюнча өкмөттөр аралык комитеттин 20-сессиясында бир добуштан кабыл алынды.
Максым боюнча номинация төрт жыл даярдалган. Кыргызстан бул арызды ЮНЕСКО катчылыгына 2023-жылы жөнөтүп, эксперттик баалоодон кийин документ комитеттин кароосуна чыгарылып, оң чечим кабыл алынды.
ЮНЕСКОнун маалыматы боюнча, дүйнөлүк материалдык эмес маданий мурастын эл аралык тизмелери азыркы учурда 153 өлкөдөн 812 элементти камтыйт. Алардын ичинен Кыргызстанга тиешелүү 16 объект катталган. Аларга эпикалык трилогия "Манас, Семетей, Сейтек", ала кийиз жана шырдак жасоо өнөрү, көчмөндөр оюндары, көк бөрү жана башка маданий мурастар кирет.
