Дональд Трамп Түштүк Корея президентине алтын ачкыч белек кылды
АКШ президенти Дональд Трамп Түштүк Кореянын президенти Ли Чжэ Менге Ак үйдүн алтын ачкычын белек кылганын Корея Республикасынын президентинин администрациясынын катчылыгынын башчысы Кан Хун Сик Facebook социалдык тармагында билдирди.
Анын айтымында, жакында Дональд Трамп ишеним грамоталарын тапшыруу аземинде Корея Республикасынын Вашингтондогу жаңы элчиси менен баарлашкан.
"АКШ лидери октябрь айында Корея Республикасына жасаган сапары учурунда баалуу белек алганын жана ага жооп катары белек бергиси келгенин айтты. Ак үйдүн алтын ачкычынын беш нускасынын акыркысы биздин президентке ыйгарылды", — деди Кан Хун Сик.
Октябрдын аягында Кёнжуда өткөн саммит учурунда Ли Чжэ Мен Дональд Трампка байыркы корей мамлекети Силланын таажысынын алтын жалатылган көчүрмөсүн белек кылып, ошондой эле өлкөнүн эң жогорку мамлекеттик сыйлыгы — "Мугунхва" орденин тапшырган.
Кан Хун Сик белгилегендей, бул ачкычтын дизайнынын автору АКШнын президенти өзү болгон. Ли Чжэ Менден тышкары, мындай белек Израилдин премьер-министри Биньямин Нетаньяхуга, Япониянын мурдагы премьер-министри Таро Асого, америкалык миллиардер Илон Маскка жана футболчу Криштиану Роналдуга да берилген.
