Дүйнөлүк күрөш уюму Айпери Медет кызына 554 миң акчалай сыйлык берет
Дүйнөлүк күрөш уюму (United World Wrestling — UWW) 2025-жылдагы дүйнө жана континенттик чемпионаттардагы, ошондой эле төрт рейтингдик мелдештеги жыйынтыктарга ылайык эң мыкты балбандардын рейтингин жарыялады.
Кыргызстандык балбан Айпери Медет кызы аялдар күрөшү боюнча 76 килограммга чейинки салмак категориясында жыйынтык рейтингде 1-орунду ээледи.
2025-жылы Айпери Медет кызы дүйнө чемпионатында күмүш медаль утуп, Азия чемпиону болду. Мындан тышкары, Албанияда өткөн рейтингдик турнирде да күмүш медалга татыды.
Бул жетишкендиктердин негизинде ал 58 600 упай топтоп, өз салмак категориясында рейтингдин сап башына чыкты.
UWW уюмунун маалыматына ылайык, эркин күрөш, грек-рим күрөшү жана аялдар күрөшү боюнча ар бир он салмак категориясында рейтингдин жеңүүчүлөрү 5 миң швейцариялык франк өлчөмүндө (болжол менен 554 миң сом) акчалай сыйлык менен сыйланышат.
Белгилей кетсек, 22-декабрда Айпери Медет кызы дүйнө чемпионатында ээлеген экинчи орду үчүн мамлекеттен 750 миң сом өлчөмүндө бир жолку сый акы алган. Ал эми 25-декабрда алдыңкы спортчуларды колдоо алкагында Президент Садыр Жапаровдун атынан балбанга үч бөлмөлүү батир белекке берилди.
