Өзбекстан биринчи жолу космоско жасалма спутник учурат
Өзбекстан эгемендүүлүк тарыхында биринчи жолу космоско жасалма спутник жана өлкөнүн жараны болгон биринчи космонавтты учуруу боюнча ишти баштаганын президент Шавкат Мирзиёев парламентке жасаган кайрылуусунда билдирди.
"Космонавт биздин ата-бабаларыбыз ачкан жылдыздарды көрүп келет", — деп ал тамаша иретинде айтты.
"Бүгүн сиздерге дагы бир маанилүү жаңылыкты билдиргим келет. Өзбекстан Республикасынын эгемендүүлүк тарыхында биринчи жолу биз космоско жасалма спутникти жана өлкөбүздүн жараны болгон биринчи космонавтты учуруу боюнча иштерди баштадык. Бул жаңы Өзбекстандын илимий-техникалык калыптанышына күчтүү түрткү берет жана жалпы улуттук өнүгүүбүздү жаңы деңгээлге чыгарат деп ишенем", — деп белгиледи мамлекет башчысы.
