Xiaomi "Гарри Поттер" франшизасынын стилинде жасалган планшетин чыгарды
Xiaomi компаниясы "Гарри Поттер" франшизасынын стилинде жасалган Redmi Pad 2 Pro планшетининлимиттелген версиясын тааныштырды. Бул модель Кытай рыногу үчүн гана чыгарылып, бренддин күйөрмандарына жана коллекционерлерге багытталган.
Redmi Pad 2 Pro Harry Potter Edition көк түстөгү дизайнда жасалып, сыйкырдуу дүйнөгө шилтеме берген декоративдүү элементтер менен кооздолгон. Ошондой эле ал кеңейтилген комплект менен айырмаланат. Топтомго ремени бар сумка, коргоочу капкак, сыйкырдуу таякча стилинде жасалган стилус жана тематикалык наклейкалар кирет.
Техникалык мүнөздөмөлөрү боюнча лимиттелген версия кадимки модель менен толук шайкеш келет. Планшет 120 Гц жаңылануу жыштыгына ээ 12,1 дюймдук дисплей, Snapdragon 7s Gen 4 процессору жана 33 Вт кубаттуулуктагы тез кубаттоо колдоосу бар 12 000 мАч батарея менен жабдылган.
Түзмөк бир гана конфигурацияда — 8 ГБ оперативдүү жана 256 ГБ ички эс тутуму менен сунушталат. Баасы кадимки версияга салыштырмалуу болжол менен 500 юанга кымбат. Harry Potter Edition модели Кытайдан тышкары өлкөлөрдө сатылышы мүмкүнбү же жокпу — азырынча маалымат жок.
