Ким Чен Ын кызы Ким Чжу Эни өлкөнүн Башкы ракеталык башкармалыгынын жетекчиси кылып дайындады
Түндүк Кореянын лидери Ким Чен Ын кызы Ким Чжу Эни өлкөнүн Башкы ракеталык башкармалыгынын жетекчиси кылып дайындаганын The Chosun Daily басылмасы жогорку кызматтагы аткаминерге таянып жазганын "Азаттык" жарыялады.
2023-жылдан бери бул кызматты мурда Улуттук коргонуу академиясын жетектеген Чан Чхан Ха аркалаганы расмий айтылып келген.
The Korea Timefuf басылмасы Түштүк Кореянын Биригүү министрлигинин өкүлүнө таянып жазгандай, Башкы ракеталык башкармалык Түндүк Кореянын өзөктүк программасын өнүктүрүүгө жооп берет. Болжол менен бул түзүм 2016-жылы түзүлгөн.
The Chosun Daily басылмасынын маалыматына караганда, Ким Чен Ын кызына бул кызматты куралдуу күчтөрдү ыкчам көзөмөлдөөнү камсыз кылуу үчүн берген. Басылма анын буга чейин эле генералдардан отчет алып, буйруктарды берип жатканын жазат.
Болжол менен 13 жаштагы Ким Чжу Э Ким Чен Ындын расмий түрдө белгилүү жалгыз баласы. Ал тууралуу алгач 2013-жылы америкалык баскетболчу Деннис Родман Пхеньянга барып келгенден кийин жазган.
Өлкө лидери кызын расмий иш-чараларга, анын ичинде өзөктүк жана ракеталык полигондорго ээрчитип жүрөт. Түштүк Кореянын Улуттук чалгын кызматы Ким Чен Ын аны мураскери катары даярдап жатат деп эсептейт.
