Айбек Жунушалиев: Бишкектин жолдорундагы тыгындарды азайтууга чыгырыктар жардам берет
Бишкек щаарынын бийлиги чыгырык тебүүгө тыюу салбайт, бирок аларды коопсуз колдонуунун так эрежелерин белгилейт.
Шаар бийлиги Бишкектин көчөлөрүнөн чыгырыктарды алып салбайт. Мындай пикирин Бишкек шаарынын мэри Айбек Жунушалиев шаардын транспорт тармагын жакшыртууга арналган ачык эксперттик жыйында билдирди.
Журналисттердин суроолоруна жооп берип жатып, мэр чыгырыкчылар жөө жүргүнчүлөргө жана айдоочуларга тоскоолдук жаратпай, коопсуз жүрүүсү үчүн шарт түзүү зарылдыгын белгиледи.
«Биз «Урбан Хаб Бишкек» биримдигинин өкүлү Алексей Журавлев айткан айрым сунуштарды ишке ашырууга даярбыз. Бардык жол кыймылынын катышуучуларына түшүнүктүү болгон так эрежелерди киргизүү керек», - деди Жунушалиев.
Ошондой эле ал, чыгырыктар жеке мобилдик каражат катары, авто унааны колдонбостон А чекитинен В чекитине жетүүгө мүмкүндүк бергендиктен, бүгүнкү күндө жолдогу тыгындар азайып жаткандыгын кошумчалады.
Изилдөөчү Алексей Журавлев өз баяндамасында Токтогул көчөсүндөгү веложолду бөлүүнү, борбордук көчөлөрдө вело өтмөктөрдү түзүүнү, Ала-Тоо аянтындагы веложолду узартууну, ал эми чыгырыкчы менен жөө жүргүнчүлөрдүн ортосундагы чыр-чатакты азайтуу үчүн көчөдөгү веложолдордо кыймылдын багыттарын көрсөтүүнү сунуштады.
«Урбан Хаб Бишкек» биримдигинин маалыматы боюнча, Бишкек шаарындагы велоинфраструктуранын жалпы узундугу 46 километрди түзөт, анын 54% тротуарларда, 7% жолдордо, калгандары парк аймактарында.
