Айланма жолго орнотулган темир-бетон устундардын сапаты текшерилди
Курулуш, архитектура жана турак жай - коммуналдык чарба министрлигине караштуу Курулушта сертификаттоонун республикалык борборунун адистери Бишкектин айланма жолундагы эстакада куруу иштери жүрүп жаткан жерде текшерүү жүргүзүштү. Бул тууралуу министрликтин маалымат кызматынан билдиришти.
Маалыматка ылайык, 30 метрлик темир-бетон устундар сыноодон өткөрүлүп, алардын жаракаларга туруктуулугу, бекемдиги жана курулуш нормаларына шайкештиги бааланды.
Текшерүүнүн негизги максаты — курулушта колдонулуп жаткан материалдардын сапатын көзөмөлдөө жана көпүрө конструкцияларынын коопсуздугун камсыз кылуу.
