"Кыргызстандын аэропорттору" ААКсы беш учакты аукционго койду

"Кыргызстандын аэропорттору" ААКсы "Манас" эл аралык аэропортунун аймагында жайгашкан, пайдаланууга жараксыз болуп калган беш аба кемесин сатуу боюнча ачык аукцион жарыяланганы аукциондун маалыматтык картасында көрсөтүлгөн.

Аукционго үч Як-40, бир Ил-18 жана Boeing 737-200 учактары коюлган. Баштапкы баалар бардык салыктарды эске алуу менен көрсөтүлгөн, аукциондун кадамы — лоттун наркынын 5%ы. Учактар Foxtrot перронунда жана топурак аянтта жайгаштырылган.

Аукционго катышуу үчүн арыздар 2026-жылдын 13-январына чейин vpmanas@airport.kg электрондук дареги аркылуу кабыл алынат. Аукциондун жыйынтыгы 14-январда чыгарылат жана аукцион бир нече лоттон турат:

Лот №1 — Як-40 EX-88199
Баштапкы баасы: 1 миллион 257 миң 460 сом.
Як-40 үй-бүлөсүнө кирген регионалдык реактивдүү учак, EX вариантында. Сыпаттамада VIP/чартердик борт катары көрсөтүлгөн жана ал толук комплектацияда.

Лот №2 — Ил-18 EX-405
Баштапкы баасы: 7 миллион 376 миң 870 сом.
Орто аралыкка учуучу турбовинттүү жүргүнчү учагы. Аукциондогу эң кымбат лот, толук комплектацияда.

Лот №3 — Boeing 737-200 EX-061
Баштапкы баасы: 3 миллион 511 миң 80 сом.
Кыска жана орто аралыкка учуучу, тар фюзеляждуу жүргүнчү учагы.
Абалы: эксплуатациядан алынган, моралдык жактан эскирген жана түз багыты боюнча пайдаланууга жараксыз. Айрым жабдуулары жок экени көрсөтүлгөн.

Лот №4 — Як-40 EX-87442
Баштапкы баасы: 1 миллион 118 миң 671 сом.
EX вариантында, учактын тиби жана компоновкасы боюнча негизги сүрөттөлүшү окшош.
Абалы: кыймылдаткычтары жок.

Лот №5 — Як-40 EX-87354
Баштапкы баасы: 1 миллион 118 миң 671 сом.
EX вариантында, №4 лотко окшош.
Абалы: кыймылдаткычтары жок.