Быйыл Кытай жарандары 5656 автоунааны Кыргызстанга алып киришкен
Акыркы убакта жолдордо Кытай мамлекеттик номерлери тагылган автоунаалар көбөйгөнү тууралуу социалдык тармактарда көп айтылгандыктан Tazabek басылмасы Мамлекеттик бажы кызматына тактоо алуу үчүн кайрылган.
Бажы кызматынын маалыматына ылайык, ЕАЭБге мүчө болбогон мамлекетте катталган, жеке пайдалануу үчүн арналган транспорт каражаттары Кыргызстандын аймагында бир жылдан ашык эмес мөөнөткө жүрө алат.
"ЕАЭБдин Бажы кодексинин 264-беренесине ылайык, Биримдикке мүчө болбогон мамлекетте катталган, чет өлкөлүк жеке адамдарга таандык жеке пайдалануудагы транспорт каражаттарын Биримдиктин бажы аймагына убактылуу алып кирүүгө бир жылдан ашпаган мөөнөткө жол берилет", – деп айтылат расмий жоопто.
Мамлекеттик бажы кызматынын маалыматтык тутумуна ылайык, 2025-жылдын башынан 20-ноябрына чейин "Торугарт" жана "Иркештам" өткөрмө пункттары аркылуу Кытай жарандары тарабынан 5656 автоунаа убактылуу алып кирилген. Алардын ичинен 3827 транспорт каражаты Кыргыз Республикасынын аймагынан чыгып кеткен.
