Быйыл Ош шаарында 81 чакырым унаа жолу курулду
Үстүбүздөгү жылы Ош шаарында 81 чакырым унаа жолу жана 25 чакырым тротуар курулду. Бул тууралуу Ош шаарынын мэри Жеңишбек Токторбаев жыл ичинде курулуш тармагында аткарылган бир катар иштер тууралуу айтып жатып билдирди.
Аны менен катар, шаар тургундарынын эс алуусу үчүн 10го жакын сейил бак курулуп, пайдаланууга берилди.
Мындан тышкары, республикалык бюджеттин эсебинен 1 бала бакча, 1 мектеп жана 1 фельдшердик-акушердик пункт (ФАП) курулуп, пайдаланууга берилди. Учурда дагы 2 бала бакчанын курулушу аяктап, жакын арада пайдаланууга берүү пландалууда.
Капиталдык оңдоп-түзөөдөн 4 мектеп жана 2 бала бакча өткөрүлдү. Ошону менен катар, шаар боюнча 50 балдар ойноочу аянтча курулуп, 7 социалдык объект реконструкцияланды.
Аткарылган иштер шаар инфраструктурасын өнүктүрүүгө, ошондой эле шаар тургундары үчүн ыңгайлуу жана коопсуз шарттарды түзүүгө багытталган.
