Бишкектеги унаа жуучу жайлар үчүн суу тарифи жогорулашы ыктымал
"Бишкексууканал" ишканасынын директору Чыңгыз Жумалиев 2024-жылдын 14-майында Бишкек шаардык кеңеши кабыл алган №133 токтомунун колдонуу чөйрөсүн кеңейтүү пландалып жатканын билдирди.
Учурдагы документке ылайык, айланма суу тазалоо системасын 2024-жылдан кийин ачылган унаа жуучу жайлар гана орнотууга милдеттүү.
Жумалиевдин айтымында, унаа жуучу жайлардын өкүлдөрү менен өткөн жыйында алар "эмне үчүн талап 2024-жылдан кийин ачылгандарга гана тиешелүү?" деген нааразычылыгын билдиришкен.
Директор жакынкы сессиялардын бирине №133 токтомго өзгөртүүлөрдү киргизүү демилгесин алып чыгып, бул талапты шаардагы бардык автомойкаларга, эч кандай өзгөчөлүксүз жайылтууну сунуштай турганын айтты.
Токтом 2023-жылы ичүүчү суу тартыштыгы жаралган шартта кабыл алынган. Анткени автомойкалар техникалык эмес, таза ичүүчү сууну колдонушат. Нормаларды сактабаганы тууралуу даттануулардан кийин "Бишкексууканал" унаа жуучу жайлардын ээлерине 2026-жылдын 1-мартына чейин тиешелүү жабдууларды орнотуу зарылдыгы тууралуу билдирүүлөрдү жөнөткөн.
Депутат Эркинбек Салымбеков талаптарды катуулатуу демилгесин колдоду, бирок аны унаа жуучу жайлар менен чектебестен, ресторандарга, кафелерге, мончо-сауналарга жана мамлекеттик гараждарга да жайылтууну сунуштады. Ал ошондой эле суу тарифи өтө төмөн — 1000 литр үчүн 10,45 сом экенин белгилеп, ресурсту үнөмдөө максатында аны кайра карап чыгууга чакырды.
Ошол эле учурда депутат бизнеске ашыкча жүк түшүрбөөгө үндөдү: жабдуунун баасы 200–250 миң сом чегинде болушу керек, ондогон миң доллар болбошу зарыл. Салымбеков "Бишкексууканал" ишканасына ишкерлерге жеткиликтүү технологиялык чечимдерди өз алдынча тааныштырып берүүнү, жөн гана милдеттендирүү менен чектелбөөнү сунуштады.
Ишкананын жетекчисинин маалыматына караганда, №133 токтомго өзгөртүү киргизилип, бардык автомойкаларга суу тазалоочу жабдууларды орнотуу үчүн 2027-жылдын 1-январына чейин мөөнөт берүү сунушталууда.
