Таластагы Беш-Таш жаратылыш паркына барчу жол асфальталат
Эгемендүүлүк күнүнө карата Таластагы Беш-Таш жаратылыш паркына баруучу унаа жолго асфальт төшөлөрүн транспорт жана коммуникациялар министри Талантбек Солтобаев социалдык тармактагы баракчасына жазды.
Министрдин маалыматына ылайык, асфальттоо иштери президент Садыр Жапаровдун тапшырмасына ылайык жүргүзүлүүдө.
"Жыл сайын миңдеген туристтер барган Беш-Таш жаратылыш паркына жетүүчү жолду оңдоо жана асфальт төшөө маселеси көп жылдан бери көтөрүлүп келген. Туризмди өнүктүрүү үчүн эң биринчи кезекте жол инфраструктурасын жакшыртып, келген конокторго жана жергиликтүү тургундарга ыңгайлуу шарт түзүү зарыл. Мамлекет башчысынын тапшырмасына ылайык, тиешелүү мекеме-ишканалардын жетекчилерине жолдорду оңдоп, 10 чакырымына асфальт төшөө боюнча тапшырма бердим. Ошондой эле дагы 10 чакырым жолду асфальттоо үчүн каражат маселеси жакын арада чечилери күтүлүүдө", - деп жазды министр.
