Суусамыр – Талас – Тараз жолунун 20 чакырымына асфальт төшөлөт
Суусамыр – Талас – Тараз унаа жолунун 104,6-197,6-чакырымдарындагы IV фазаны реконструкциялоо иштери уланууда. Бул тууралуу Транспорт жана коммуникациялар министрлигинин маалымат кызматы билдирди.
Транспорт жана коммуникациялар министринин орун басары Бактылуу Момбеков Талас облусуна болгон иш сапарынын алкагында жолдогу иштердин жүрүшү менен таанышып, тиешелүү кызматтарга тапшырмаларды берди.
Учурда курулуш иштерине 220 атайын техника жана 473 адис тартылган.
Жолдун 53,1 чакырымында негизди кеңейтүү иштери аткарылып, 10,4 чакырымга төмөнкү, 5,95 чакырымга жогорку негиз катмары төшөлдү. Ошондой эле 4,35 чакырымга асфальт-бетондун төмөнкү катмары төшөлдү.
Мындан тышкары, көпүрөлөрдү жана жер алдындагы өтмөктү кошкондо 7 объектте курулуш иштери жүрүүдө. Долбоордо каралган 190 суу өткөрүүчү түтүктүн 41и толугу менен бүткөрүлдү.
Бекитилген графикке ылайык, 2026-жылдын аягына чейин 20 чакырым жаңы асфальт-бетон төшөө жана жалпы иштердин көлөмүн 25%га жеткирүү пландалууда.
Реконструкция иштерин "Shaanxi Construction Engineering Group Co., Ltd." компаниясы жүргүзүүдө. Курулушту 2028-жылдын 25-апрелине чейин аяктоо пландалган. Объект пайдаланууга берилгенден кийин подрядчы тарабынан 5 жылдык кепилдик берилет.
