Жакынкы күндөрү “Дордой” базарынын айланасындагы көчөлөр ачылат
Бишкек шаарындагы “Дордой” базарынын айланасындагы жол инфраструктурасын оңдоо иштеринин экинчи этабынын алкагында бир катар тилкелердеги иштер толугу менен аяктады.
Бишкек шаардык мэриясынын маалыматына ылайык, оңдоо иштеринин жүрүшүндө жолдор кеңейтилип, тротуарлар жана ирригациялык системалар курулду.
Алдыдагы 10 күндүн ичинде Кожевенная көчөсүнөн Чымкент көчөсүнө чейинки Безымянная көчөсүн, ошондой эле Безымянная көчөсүнөн Түндүк айланма жолуна чейинки Чымкент көчөсүн унаа кыймылы үчүн ачуу пландалууда.
Элебесов көчөсүндө Кожевенная көчөсүнөн Түндүк айланма жолуна чейинки тилкеде иштер жүргүзүлүүдө. Бул тилкедеги иштер суу түтүктөрүн жана канализациялык түтүктөрдү тартуу иштерине байланыштуу созулууда.
Айбек Жунушалиев иштердин жүрүшү менен таанышып, жооптуу кызматтарга жана подряддык уюмдарга аткарылып жаткан иштердин сапатын талаптагыдай камсыз кылууну жана белгиленген мөөнөттөрдү так сактоону тапшырды.
