«Кумтөр» иши боюнча кимдер суракка алынып, кимдер камалды? Тизме жаңырууда
«Кумтөр» маселеси боюнча учурдагы жана мурдагы чиновниктердин бир канчасы камалды. Парламенттин депутаттары, экс-премьер-министрлер, ошондой эле учурдагы атка минерлер кезек менен суракка чакырылып, натыйжада, айрымдары камакка алынууда. Процесс уланууда, анткени бүгүн эле саясатчылардын жаңы партиясы Улуттук коопсуздук боюнча мамлекеттик комитетке суракка чакырылды.
Economist.kg редакциясы «Кумтөр» кениндеги коррупциялык иштер боюнча кармалгандардын жана суракка алынгандардын тизмесин даярдады.
27-май
- Мурдагы премьер-министр Темир Сариевди Аскер прокуратурасында суракка алышты.
31-май
- Экс-депутат Сергей Ибрагимов «Кумтөр» иши боюнча УКМКга чакырылып, «Центерра Голд» менен 2009-жылы түзүлгөн келишим боюнча суракка алынган. Ал кезде Сергей Ибрагимов «Ак жол» партиясынан депутат болгон.
- Мурдагы депутат Турсунтай Салимов да суракка чакырылган.
- Экс-премьер-министр жана «Республика» партиясынын мурдагы лидери Өмүрбек Бабанов күбө катары УКМКга суракка чакырылган. Бирок бир нече сааттан кийин ал коррупцияга тиешеси бар деген айып менен камалган.
- ЖКнын депутаты Асылбек Жээнбеков компаниянын Centerra Gold менен түзүлгөн келишимдеринин биринин негизинде козголгон кылмыш иши боюнча күбө катары УКМКга суракка чакырылган. Кийин ал дагы коррупцияга шектелип кармалган.
- Депутат Төрөбай Зулпукаров дагы «Кумтөр» маселеси боюнча Centerra Gold менен түзүлгөн келишимдин чоо-жайы тууралуу маалымат бериш үчүн УКМКга суракка чакырылган. Кийинчерээк анын мыйзамсыз байыганын иликтөө үчүн камакка алынган.
- Экс-депутат Исхак Пирматов да башында суракка чакырылып, кийин ал да камакка алынган.
- Ушул эле күнү кечинде экс-премьер-министр Игорь Чудинов суракка чакырылган.
- Кийинчерэкк УКМКнын маалымат кызматы экс-депутат Талант Узакбаевдин кармалганын маалымдаган.
1-июнь
- Парламенттин экс-спикери Дастанбек Жумабеков УКМКга суракка чакырылды.
- ЖКнын депутаты Рыскелди Момбеков УКМКга суракка алынды.
- ЖКнын мурдагы депутаты Максат Сабиров «Кумтөр» маселеси боюнча УКМКда суракка алынды. Ал журналисттерге 2012-2013-жылдары «Кумтөр» боюнча комиссиянын мүчөсү болгондуктан, күбө катары чакырылгандыгын айткан.
Учурда экс-премьер-министр Өмүрбек Бабанов кармалып, депутаттар Төрөбай Зулпукаров менен Асылбек Жээнбеков УКМКнын СИЗОсуна эки айга камалды. Экс-депутаттар Исхак Пирматов менен Талант Узакбаевдин дагы камакта экени белгилүү, бирок канча убакка камалганы белгисиз.
Эскерте кетсек, 14-майда президент Садыр Жапаров жер казынасын коргоо эрежелеринин бузулушунан, экологиялык маселелерден улам «Кумтөргө» тышкы башкаруу киргизүү жөнүндө мыйзамга кол койгон. 15-майда «Кумтөр Голд Компанинин» Бишкектеги кеңсеси тинтүүгө алынган. 17-майда парламенттин кезексиз сессиясында УКМКнын башчысы Камчыбек Ташиев «Кумтөргө» байланыштуу төрт кылмыш иши жүрүп жаткандыгын айткан эле.
