Жаңы «Смарт Бажы» санарип платформасы иштелип чыкты – МБК

Мамлекеттик бажы кызматы жаңы «Смарт Бажы» санарип платформасынын долбоорун иштеп чыкты. Бул тууралуу ведомствонун маалымат кызматы билдирди.

МБКнын төрагасынын орун басары К.Шатемировдун айтымында, санарип платформаны түзүүнүн максаты – тышкы экономикалык ишмердиктин субъекттери үчүн ылайыктуу шарттарды камсыздоо, ошондой эле өлкөнүн экономикасына инвестицияларды жогорулаткан бажылык жөнгө салуунун сапатын жогорулатуу болуп эсептелет.

Алдыга коюлган максаттар төмөнкү жолдор менен ишке ашырылат: 

• электрондук декларациялоого толук өтүү

• товарлардын авточыгаруусун киргизүү

• товарларды жана транспорт каражаттарын ташып өтүүдө «жашыл коридорлорду» колдонуу (анын ичинде ТЭИ катышуучуларын категориялоонун эсебинен)

• электрондук декларациялоо борборлорун ишке киргизүү

• бизнес платформалар менен терең интеграция

• өткөрүү пункттарында контролдук функцияларды жүзөгө ашырууда «Бир аялдама» принцибин толук кандуу киргизүү

Долбоорду ишке киргизүү 2021-2023-жылдарга этаптарга бөлүнгөн. «Смарт Бажы» платформаны түзүүдө жергиликтүү  IT-компаниялар иштешет.