Марипов МИКтин 4%дык ипотека программасынын ишке ашаарынан күмөн санады
Министрлер Кабинетинин Төрагасы Улукбек Марипов «Менин үйүм 2021-2026» жаңы турак жай программасынын ишке ашаарынан күмөн санады. Ал Президенттин Администрациясынын түзүмдүк бөлүмдөрүнө сунушталган программаны кеңири карап чыгууну жана долбоордун максатка ылайыктуулугуна өзгөчө көңүл бурууну тапшырды. Бул тууралуу бир күн мурда, 9-июнда өткөн жыйында белгилүү болгонун өкмөттүн маалымат кызматы билдирди.
Төраганын айтымында, аткарылгыс тапшырмаларды алдыга коюунун кажети жок, бардык иш-аракеттер реалдуу мүмкүнчүлүктөр менен шайкеш келүүсү зарыл.
«Сунушталган программага ылайык, пайыздык чек 4%га чейин төмөндөйт, баштапкы төлөө үчүн эч кандай талап жок. Булар, албетте, жакшы шарттар. Бирок программаны кабыл алуудан мурда, бардык тобокелчиликтерди эсептеп чыгуу керек, эң башкысы, каржылоо булактарын аныктоо керек», – деп баса белгиледи Марипов.
Анын айтымында, калкты мамлекеттик жеңилдетилген турак-жай менен камсыз кылуу – социалдык жактан маанилүү программа. Бирок, ипотекалык компания мындай жоопкерчиликти өзүнө алгандан кийин, бул милдеттенмелерди кандайча жана канча убакытта аткарыларын көрсөтүү керек.
«Мамлекеттик ипотекалык компания» ААКнын төрагасы Аида Төлөгөнованын маалыматына таянсак, кийин сатып алуу максаты менен ижарага берилүүчү турак жайдын механизмин иштеп чыгуу, баалуу кагаздарды чыгаруу жана жайгаштыруу аркылуу мамлекеттик ипотеканы насыялоо секторуна каражат тартуу, ошондой эле инвестицияларды алып келүү боюнча иштер жүрүп жатат.
«МИК» «ортомчу» имиджинен алысташы керек, уюмдун иштөө принцибин толугу менен өзгөртүү керек. Иштин негизги өзөгү – жарандар иш жүзүндө арзан турак-жай сатып алуу мүмкүнчүлүгүнө ээ болушу керек», – деди Марипов.
