Wall Street Journal: Нью-Йорк соту «Кумтөр Голд Компанинин» банкроттукка байланыштуу арызын канааттандырды
«Кумтөр Голд Компани» жана «Кумтөр Оперейтинг Компанинин» банкроттукка байланыштуу арыздары канааттандырылды. Нью-Йорктун түштүк округ боюнча сотунун 8-июндагы чечимине ылайык, компанияларды кылмыш жоопкерчилигине тартууга, алар менен соттошууга жана алардын мүлкүн конфискациялоого болбойт. Кен казуу иштери боюнча келишимдерди бузууга же өзгөртүүгө да жол берилбейт.
The Wall Street Journal басылмасынын маалыматына таянсак, бул чектөөлөр бардык жеке жактарга, ошондой эле чет өлкөлүк же жергиликтүү мамлекеттик органдарга да тиешелүү.
Кыргыз бийлиги бул чечим боюнча азырынча комментарий бере элек. Нью-Йорктогу сотто кыргыз өкмөтү жалдаган юридикалык компаниянын адвокаттары Кумтөр кенинде тышкы башкарууну киргизүү чечими мыйзамдуу болгон деп белгилешкен.
Эскерте кетсек, Centerra Gold Inc. «Кумтөр Голд Компани» жана «Кумтөр Оперейтинг Компани» ишканаларынын банкрот болуусун «уюштуруу» демилгесин көтөргөн жана компания АКШнын банкроттуулук жөнүндөгү федералдык кодексинин 11-бөлүмүнүн негизинде Нью-Йорктун Түштүк округу боюнча сотуна кайрылуу жолдошкон болчу.
«Центерра» бул процесс кыргыз өкмөтү менен мүмкүн болгон сүйлөшүүлөрдү жеңилдетет деп үмүттөнгөнүн билдирген. Компаниянын маалыматына таянсак, Федералдык кодекстин 11-бөлүмү – коюлган доолордун компаниянын башка бизнестерине, анын ичинде Канададагы «Маунт Миллиган» жана Түркиядагы «Оксют» кенине, ошондой эле Түндүк Америкадагы молибден бизнесине таасир этпөөсүн камсыздайт.
Белгилей кетсек, мындай банкроттун демилгечиси адатта менчик ээси бойдон калат, ыйгарым укуктарга жана милдеттенмелерге ээ болуп, ишкердик ишин уланта алат. Соттун макулдугу менен акчаларды карызга алуу укугуна да ээ болот.
