Жумуш берүүчүлөр эмгек акыларды конвертте берип баштайт – бизнес социалдык чегерүүлөрдүн көбөйүшүнө тынчсызданууда
КР мамлекеттик социалдык камсыздандыруу боюнча чегерүүлөрдүн ставкаларын жогорулатууну көздөөдө: жумуш берүүчүлөр үчүн 15.25%га чейин жана кызматкерлер үчүн 13%га көтөрүлмөкчү. Бизнес Акыйкатчы Робин Орд-Смит президенттин 2021-жылдын 5-майындагы кайрылуусунда айтылган жоболорго каршы келген бул демилгеге кабатырланып турганын билдирди.
Президент өзүнүн кайрылуусунда, 2021-жылдын 1-октябрына чейин социалдык төлөмдөрдүн тарифтерин төмөндөтүү боюнча жаңы мыйзамды ЖКнын кароосуна алып чыгууну тапшырганын Бизнес-омбудсмен Институту эскертет.
Орд-Смиттин айтымында, бул демилге мамлекеттик органдар жана бизнес коомчулугу менен талданып, талкууланышы керек, анткени ал өлкөнүн ишкер чөйрөсүнө жана инвестициялык климатына терс таасирин тийгизип эле тим болбостон, коррупциялык тобокелдиктерди жаратып, бизнестин андан ары көмүскө экономикага киришине шарт түзөт.
Бизнес-омбудсмендин пикиринде, чоң төлөмдөрдү көрсөтпөш үчүн, ишкердик субъекттер жумушчуларга эмгек акысын «конвертте» төлөөнү улантышы мүмкүн. Андай боло турган болсо, мамлекетке жана калктын аз камсыз болгон катмарына төлөмдөр азаят.
Кыргызстандагы бизнес коронавирус пандемиясынын кесепеттеринен жана былтыркы октябрь окуяларынан улам кыйынчылыктарды баштан кечирүүдө. Ошондуктан, милдеттүү төлөмдөрдүн көбөйүшү – бизнес үчүн кырдаалды начарлатып, жалпы өлкө экономикасына терс таасирин тийгизиши мүмкүн.
«КРнын айрым мыйзам актыларына өзгөртүүлөрдү киргизүү жөнүндө» («Мамлекеттик социалдык камсыздандыруу боюнча камсыздандыруу төгүмдөрүнүн тарифтери жөнүндө», «КРнын мамлекеттик социалдык камсыздандыруу боюнча пенсиянын топтолгон бөлүгүн каржылоого каражаттарды инвестициялоо жөнүндө» мыйзамдарына) мыйзам долбоору коомдук талкууга 2021-жылдын 27-майында берилип, ЖКнын сайтында жарыяланган.
