«Карвен групп» компаниялар ассоциациясынын ээси Генрих Балян тергөө абагына киргизилди – УКМК
«Карвен групп» компаниялар ассоциациясынын ээси жана Венгриянын Кыргызстандагы ардактуу консулу Генрих Балян Улуттук коопсуздук боюнча мамлекеттик комитеттин (УКМК) кызматкерлери тарабынан кармалып, алдамчылык иши боюнча тергөө абагына киргизилди. Бул тууралуу бүгүн, 16-июнда комитеттин басма сөз кызматы билдирди.
«Карвен групп» компаниялар ассоциациясынын ээси Генрих Балян мамлекеттик үлүшү бар банктардын биринин жооптуу кызматкерлери менен тымызын келишип, 2.3 млн доллар жасалма адамга ири насыя алыш үчүн, 670 миң доллар өлчөмүндө өтө жогору бааланган ликвиддүү эмес кыймылсыз мүлктү күрөөгө койгондугу аныкталган.
Учурда Балян тергөө камак жайынын убактылуу кармоочу жайына киргизилди жана жакынкы аралыкта ага карата баш коргоо чарасын кароо маселеси каралат.
Белгилей кетсек, мурда ушул кылмыш ишинин алкагында, аталган кылмыш ишин жасоого түздөн-түз тиешеси бар делип, аталган банктын башкармалыгынын төрагасынын мурдагы орун басары А.К. кармалган.
