1-июлдан баштап Ош шаарында той, маараке жана коомдук иш-чараларга тыюу салынат
Ош шаардык мэриясында коронавирустун жайылышын алдын алуу боюнча жыйын болуп өттү. Санитардык-эпидемиологиялык көзөмөл стандарттарын кармоо үчүн ресторандардын, тойканалардын, коомдук тамактануучу жайлардын жетекчилеринин жана администраторлорунун жоопкерчилигин жана санитардык эрежелердин сакталышын текшерүү боюнча иштерди күчөтүү маселелерине өзгөчө көңүл бурулду.
Белгиленгендей, 1-июлдан баштап түштүк борбордо той, маараке жана коомдук иш-чараларды өткөрүүгө тыюу салынат, буга байланыштуу ресторандардын, тойканалардын администраторлоруна 1-июлдан баштап коомдук иш-чараларга буйрутма албоо сунушталды.
Шаардын вице-мэри Эмил Шадыхановдун айтымында, санитардык нормаларды жана эрежелерди бузгандар мыйзам чегинде жооп беришет.
«Азыр биздин алдыбызда санитардык ченемдердин сакталышына көзөмөлдү күчөтүү милдети турат. Бул жарандар массалык чогулган жайларга тиешелүү. Жарандарды санитардык ченемдерди жана эрежелерди так сактоого, медициналык маска кийүүгө, колду дезинфекциялоого, социалдык аралыкты сактоого үндөө зарыл. Мындан тышкары, ар кандай массалык иш-чараларды өткөрүүдөн жана көп адамдар чогулган тамактануучу жайларга баруудан алыс болууну сунуштайбыз. Ош шаарында кырдаал татаалдашууда – күн сайын 100гө жакын жаңы инфекция учурлары аныкталып жатат. Санитардык ченемдерди аң-сезимдүү сактоо гана инфекциянын жайылышын токтотот», – деп түшүндүрдү вице-мэр.
