Баткенге келбеген ИИМдин башчысы Ысык-Көлгө барып, милициянын туристтик сезонго даярдыгын текшерди
Кыргыз-тажик чек арасындагы жаңжал учурунда Баткен облусуна келбеген Кыргызстандын Ички иштер министрлигинин башчысы Улан Ниязбеков Ысык-Көлгө барып, Чолпон-Ата шаарындагы милициянын туристтик сезонго даярдыгын текшерди.
Ички иштер министрлигинин басма сөз кызматы билдиргендей, 16-июнь күнү Ниязбеков Чолпон-Ата шаарынын эски аэропортунда өткөн Ысык-Көл облусунун ички иштер органдарынын өздүк курамынын гарнизондук иш-чарасына катышкан. Иш-чарага өкмөттүн облустагы ыйгарым укуктуу өкүлү Мирбек Кожоев дагы катышты.
Гарнизондук иш-чарада Ниязбеков бардык ички иштер органдарын туристтик сезондо эки негизги багытта иштөөнү тапшырды:
- Биринчиден, коомдук жайларда, көчөлөрдө жана эс алуу жайларында коомдук тартипти сактоону өз деңгээлинде уюштуруу, кылмыштуулуктун алдын алууга өзгөчө көңүл буруп, жергиликтүү жана чет элдик жарандарды кылмыш чөйрөсүнө аралашусунун алдын алуу.
- Экинчиден, коомдук тартипти сактоо менен катар, жарандар үчүн коопсуз шарт түзүү максатында жол кырсыктарын алдын алуу, жол кыймылынын коопсуздугун камсыз кылуу, ошондой эле жергиликтүү бийлик, тиешелүү мамлекеттик органдар менен өз ара тыгыз аракеттенүү боюнча күчөтүлгөн чараларды уюштуруу.
