Жакында баалар турукташат – Монополияга каршы жөнгө салуу мамлекеттик агенттиги билдирет
19-июнда Монополияга каршы жөнгө салуу мамлекеттик агенттигинин жетекчилиги жана департаменттин Бишкек шаары жана Чүй облусу боюнча кызматкерлери тарабынан Сары Өзөн жана Орто-Сай базарларында баалардын негизсиз көтөрүлүшүнө жол бербөө боюнча иш-чараларды өткөрүштү. Бул тууралуу агенттиктин маалымат кызматы билдирди.
Базардагы сатуучулар менен болгон иш-чарада сабизге, картошкага жана башка жашылчаларга баанын негизсиз өсүшүн алдын алуу боюнча түшүндүрүү иштери жүргүзүлдү.
Агенттиктен билдиргендей, жакын арада жаңы түшүм чыгат жана баалар турукташат.
Монополияга каршы органдын кызматкерлери күн сайын КРнын бүткүл аймагындагы базарларда жана соода түйүндөрүндө түшүндүрүү иштерин жүргүзүп жатышканын Монополияга каршы жөнгө салуу агенттиги кабарлайт.
Эскерте кетсек, өткөн аптада 1кг сабиздин баасы 100 сомго көтөрүлгөн болчу. Анын себебин Айыл-чарба министрлиги – ЕАЭБ өлкөлөрүнө, тактап айтканда, Россия менен Казакстанга экспорттоонун ири көлөмү менен байланыштырган.
