Бириккен Улуттар Уюму Өнүгүү Программасынын алкагында Covid-19 пандемиясынан жабыркаган 13 ишкерге дээрлик 10 миң доллардан гранттык каражат берди. Бул долбоор Жаш ишкерлер Ассоцияциясы (JIA) менен биргеликте жарыяланган сынактын негизинде ишке ашканын ЖИАнын маалымат кызматы билдирди.

Ишкерлер биримдигинин маалыматына ылайык, берилген гранттар ишкерлерге керектүү жабдууларды сатып алып, иш орундарды көбөйтүүгө жана өндүрүшүн кеңейтүүгө мүмкүнчүлүк берүүдө.

Эскерте кетсек, пандемия учурунда орто жана кичи бизнес эң көп жабыркаган. Бүткүл Дүйнөлүк Банктын КРгы баш кеңсесинин өкүлү Навид Накви да Economist.kg сайтына берген маегинде: «Кичи жана орто ишканалардын тезирээк финансылык туруктуу абалга келишине жана жумуш орундарын түзүүсүн камсыз кылыш үчүн аларга колдоо керек. Ковидден кийинки кризис менен ийгиликтүү күрөшүп жаткан өлкөлөрдүн баары ушундай антикризистик чараларды колдонуп жатышат», – деп айткан болчу.

«Коронавирус пандемиясы саламаттыкты сактоо, билим берүү тармагынан тартып, миграция маселесине чейин өлкөгө чоң сокку урду. Деңизге чыгууга мүмкүнчүлүгү жок, кичине, экономикасы кызмат көрсөтүү, мигранттардын акча которуусунан жана жаратылыш ресурстарынан көз каранды Кыргызстан – акыркы жылдардагы өнүгүүнүн жакшы жетишкендиктерин жокко чыгарып кое алгыдай болгон дүйнөлүк пандемиянын негативдүү таасиринде калды.

Болжолдуу анализ көрсөткөндөй, аталган кризистин масштабы 30 жыл илгери СССР кыйрагандагы социалдык-экономикалык катаклизм менен барабар болуп жатат», – деген эле ал.

Белгилей кетсек, 2020-жылы пандемия учурунда КРгы жакырчылыктын деңгээли 20.1%дан 31%га чейин өскөн, жыйынтыгында, жакырчылыкка дагы 700 миң адам кириптер болгон.