«Эгерде документ октябрдын башында күчүнө кирсе, анда айдын аягында, ноябрдын башында электр, ысык суу жана жылуулук үчүн жаңы эсептер болот», – деди бүгүн, 14-сентябрда пресс-конференцияда Энергетика жана өнөр жай министринин орун басары Тилек Айталиев.

Анын айтымында, документ жаздан бери талкууланып келет. Ага өзгөртүү киргизилди, эми орто мөөнөттүү тариф саясаты президенттик администрацияда жана министрлер кабинетинин кеңсесинде талкууланып жатат.

Белгилей кетсек, өнөр-жай ишканалары үчүн коюлуп жаткан тарифке бизнес нааразы. Алардын пикиринде, өнөр-жай республикадагы жалпы электр энергиянын он пайызын эле колдонгону менен мамлекет алар үчүн аябай эле жогорку тарифти коюп койгон. Ал эми негизги керектөөчү болгон калкка тариф анчейин деле көтөрүлбөдү дешет алар.  

Энергетика министрлиги өнөр жай ишканалары үчүн электр энергиясынын жаңы сунушталган тарифтерин кайра карап чыгуу боюнча бизнес өкүлдөрүнүн өтүнүчүнө түшүндүрмө берди.

Министрлик бул керектөөчүлөрдүн продукцияларынын баасы жыл сайын өсүп жатат, бирок алар үчүн электр энергиясынын тарифи 2014-жылдан бери өзгөрүүсүз калып келет деп түшүндүрдү.

Эскерте кетсек, энергияны көп талап кылуучу керектөөчүлөрдүн (майнинг ишканалары, алтынды кайра иштетүүчү фабрикалар, куюучу заводдор, эритүүчү жана алкоголдук ичимдиктерди чыгаруучу ишканалар) айрым категориялары үчүн керектүү чыгымдарды жабуу үчүн 2021-жылдан тартып электр энергиясына тарифтерди жогорулатуу сунушталууда.

Алар үчүн электр энергиясынын тарифин 2.0 көбөйтүүчү коэффициентти колдонуу менен, өнөр жай керектөөчүлөрү үчүн 2.52 сом кВт/саат (салыктарды эске албаганда) тарифин коюу сунушталууда. Керектөөчүлөрдүн бул категориясы үчүн жалпы тариф 5.04 сом кВт/с болот (салыктарды эске албаганда).

Болжолдуу маалыматтарга ылайык, 2021-жылы 3 млрд кВт/саатка чейин электр энергиясынын тартыштыгы күтүлүүдө. Бул тууралуу Энергетика жана өнөр жай министрлиги билдирди.