«Центерра» Кумтөрдү басып алуу боюнча кыргыз бийлигин жоопко тартууга аракет кылат
Канадалык алтын өндүрүүчү Centerra Gold Inc. (Кыргызстандын үлүшү 26.4%) «Кумтөр» кенин басып алуу боюнча кыргыз өкмөтүн жоопкерчиликке тартууга аракет кылат.
Centerra Gold Inc. компаниясы Министрлер кабинетинин төрагасы Акылбек Жапаровдун «Кумтөр» кенине байланыштуу айткандары боюнча билдирүү таратты. Анда компания кенге байланыштуу Кыргызстандын өкмөтүн жоопкерчиликке тартуу боюнча бардык мыйзамдуу аракеттерди көрүүнү уланта берери жазылган.
«Биз буга чейинки чыгарган маалыматта ачык белгилегендей, «Кумтөр» мындан ары да толугу менен Centerra Gold Inc. компаниясына таандык туунду компания болуп саналат жана биз «Кумтөр» кенин мыйзамсыз басып алгандыгы үчүн Кыргызстандын өкмөтүн жоопкерчиликке тартуу боюнча бардык мыйзамдуу аракеттерди жасоону улантабыз. Биздин билдирүүбүздө жаңы эч нерсе жок. Болгону 2021-жылдын 10-августунда кендеги биздин балансыбыздагы бизнес-операциянын токтогондугун билдирген кулактандырууну гана чагылдырат», – деп айтылат маалыматта.
Economist.kg маалымдагандай, 19-ноябрда Centerra Gold компаниясы Кыргызстан тарабынан жасалган бир катар аракеттердин натыйжасында, «Кумтөр» кенин басып алууга жана жоготууга алып келген олуттуу өзгөрүүлөр тууралуу маалымат бергенин жарыялаган болчу.
«Центерра Голд» кенди жоготуудан 926.4 млн доллар зыян тартканын билдирген.
Ал эми КРнын Министрлер кабинетинин төрагасы Акылбек Жапаров Кумтөр кенинин тегерегиндеги соңку абал боюнча 20-ноябрда билдирүү тараткан эле.
«Мындан бир нече саат мурда, Канада убактысы боюнча 19-ноябрда, кечке маал биржалык соода жыйынтыкталгандан кийин Centerra Gold Inc. компаниясы аларга мындан ары кыргыз элинин улуттук мурасы – «Кумтөр» кени таандык эместигин тааныгандыгы тууралуу чечим кабыл алды. Centerra Gold Inc. өзүнүн баланстык наркынан 926 млн. долларды эсептен чыгарууга жана Кумтөр кенине көзөмөлдү жоготконун билдирүүгө аргасыз болду», – деген болчу ал.
