Шанхай – Бишкек аба каттамын ачуу маселеси талкууланды
"Кыргызстан аэропортторунун” жетекчиси Кытайдын эң ири авиакомпанияларынын бири – China Eastern Airlines компаниясынын жетекчилиги менен сүйлөшүүлөрдү өткөрдү. Бул тууралуу Манас Самидинов билдирди.
Маалыматка ылайык, Шанхай – Бишкек – Шанхай багыты боюнча түз аба байланышын ачуу маселеси талкууланды. Бул – Кыргызстанды дүйнөгө ачуу, жарандар үчүн саякаттоого, бизнес жүргүзүүгө жана эл аралык кызматташтыкты өнүктүрүүгө жаңы мүмкүнчүлүктөрдү түзүү максатында ырааттуу ишке ашырып жаткан долбоор.
“Бүгүнкү күндө Кыргызстан жарандык авиацияны өнүктүрүүнүн жаңы этабын баштан кечирүүдө. Биз заманбап аба майдандарды куруп, маршруттук түйүндү кеңейтип, дүйнөнүн алдынкы авиакомпанияларын кызматашууга тартуу менен, өлкөбүздү чыгышты жана батышты байланыштырган маанилүү транспорттук борборго айландырып жатабыз”, - деди Самидинов.
Шанхайга түз каттамдын ачылышы жөн гана учуулар картасындагы жаңы багыттын пайда болушу эмес. Ал Кыргызстанды дүйнөнүн эң ири экономикалык, финансылык жана технологиялык борборлорунун бири менен байланыштырат. Бул – арбын туристтер, инвестициялар, ата мекендик бизнес үчүн жаңы мүмкүнчүлүктөр жана Кыргызстан менен Кытай Эл Республикасынын ортосундагы кызматташтыктын мындан ары да чыңдалышы дегенди билдирет.
Бүгүнкү күндө эки өлкөнүн ортосунда соода-экономикалык байланыштар, инвестициялар жана гуманитардык кызматташтык жигердүү өнүгүүдө.
