Саламаттык сактоо тармагынын бюджети 51,9 млрд сомго жетти
Саламаттык сактоонун консолидацияланган бюджети дээрлик эки эсеге көбөйүп, 51,9 миллиард сомго жетти. Бул тармактын мүмкүнчүлүктөрүн кыйла кеңейтүүгө, материалдык-техникалык базаны чыңдоого жана бир катар маанилүү долбоорлорду ишке ашырууга шарт түздү. Бул тууралуу Саламаттык сактоо министри Дамир Осмонов билдирди.
Маалыматка ылайык, беш жылдын ичинде 21 саламаттык сактоо объектиси пайдаланууга берилди, дагы 42 ири объект курулуштун ар кандай этаптарында турат. Ош жана Талас шаарларында заманбап перинаталдык борборлор курулуп жатат, өлкө боюнча ооруканаларды жана бейтапканаларды модернизациялоо улантылууда.
Ошондой эле дары-дармек менен камсыздоо тутумун өркүндөтүү маанилүү багыт бойдон калууда. Жакын арада “Кыргызфармация” мамлекеттик ишканасынын тиешелүү дистрибьютордук практиканын талаптарына жооп берген заманбап кампасын куруу пландаштырылууда. Бул дары-дармек каражаттарын сактоонун тиешелүү шарттарын камсыз кылууга, логистиканын натыйжалуулугун жогорулатууга жана калкты дары-дармек менен камсыздоо тутумун ишенимдүү жана туруктуу кылууга мүмкүндүк берет.
