“Тамчы” атайын финансылык-инвестициялык аймагына 20 млрд доллар инвестиция тартылат
3-июлда Ысык-Көл облусунун Тамчы айылында президент Садыр Жапаровдун катышуусунда “Тамчы” атайын финансылык-инвестициялык аймагынын расмий ачылыш аземи өттү.
Экономика жана коммерция министрлигинин маалыматына ылайык, иш-чаранын жүрүшүндө мамлекет башчысы жаңы аймактын алгачкы чет өлкөлүк резидент-инвесторлоруна беш сертификат тапшырды.
Аземге Экономика жана коммерция министри Бакыт Сыдыков катышып, бул долбоор өлкөдөгү эң ири инвестициялык долбоорлордун бири экенин белгиледи.
Министрдин айтымында, 2031-жылга чейин АФИТке болжол менен 20 млрд доллар өлчөмүндө инвестиция тартылып, 10 миңге жакын жаңы жумуш орду түзүлөт. Алардын басымдуу бөлүгү Кыргызстандын жарандары үчүн каралат.
Бакыт Сыдыков белгилегендей, “Тамчы” АФИАны өзүнчө обочолонгон аймак эмес. Ал алдыңкы технологияларды жайылтууга, ишкердикти өнүктүрүүгө, чет өлкөлүк инвестицияларды тартууга жана өлкөнүн атаандаштыкка жөндөмдүүлүгүн жогорулатууга багытталган заманбап инвестициялык платформа болуп саналат.
Ошондой эле келечектеги резиденттер үчүн каттоо жана лицензиялоо шарттары тааныштырылды. Долбоордун уюштуруучуларынын маалыматына ылайык, АФИАда иш жүргүзүү компанияларга операциялык жана жөнгө салуучу чыгымдарды дүйнөдөгү башка финансылык жана инвестициялык юрисдикциялар менен салыштырганда 60%га чейин кыскартууга мүмкүндүк берет.
Белгилей кетсек, “Тамчы” АФИА 2025-жылдын 10-июлундагы №136 мыйзамынын негизинде түзүлгөн. 2035-жылга чейин аймакта 3 900дөн ашык компанияны жайгаштыруу жана 10 миңден ашуун жумуш ордун түзүү пландалууда.
