Азиз Аалиев: Кумтөрдөн өткөн жылы 7 айда алтын түрүндө 200 млн доллар киреше алдык
Кумтөрдөн өткөн жылы 7 айда эле алтын түрүндө 200 млн доллар киреше алдык. Бул тууралуу бүгүн, 11-февралда Транспорт жана жолдор министрлигинин коллегиясында Министрлер кабинетинин төрагасынын биринчи орун басары Азиз Аалиев билдирди.
Анын айтымында, кыргыз бийлиги тарабынан тышкы башкаруу киргизилгенге чейин Кыргызстан орточо эсеп менен 3-4 млн доллар дивиденд алып турган.
«Кумтөрдөн өткөн жылы 7 айда эле алтын түрүндө 200 млн доллар киреше алдык. Жакынкы арада юридикалык маселелер чечилип, Кумтөр толугу менен Кыргызстандын балансына өтсө, анда биздин эсептөөлөр боюнча, мамлекеттин Кумтөрдөн түшкөн кирешеси 400-500 млн долларга чейин көбөйөт», – деди ал.
Ошондой эле Аалиев 2021-жыл мамлекет үчүн оор болгонун, энергетикалык каатчылык, кургакчылык, азык-түлүк коопсуздугу маселеси, күйүүчү-майлоочу майдын баасы кескин көтөрүлгөнүн кошумчалады.
