Онлайн соода менен алектенгендер ЭЭФтин жаңы формасын үйрөнүштү
Мамлекеттик салык кызматы электрондук соода аянтчаларынын өкүлдөрү жана электрондук сооданын катышуучулары (селлерлер) үчүн окутуучу семинар өткөрдү. Бул тууралуу Салык кызматынан билдиришти.
Иш-чарага Салык кызматынын төрагасынын орун басары Кубанычбек Ысабеков, электрондук соода аянтчаларынын, тигүү тармагынын жана профилдик ассоциациялардын өкүлдөрү катышты.
Жолугушууда катышуучуларга электрондук эсеп-фактуранын (ЭЭФ) жаңы формасы сунушталып, аны колдонуунун өзгөчөлүктөрү жана бекитилген тартиби боюнча толук түшүндүрмөлөр берилди. Кубанычбек Ысабеков белгилегендей, ЭЭФтин жаңы формасы бизнес үчүн жагымдуу шарттарды түзүү жана товарларды Кыргыз Республикасынын аймагынан үзгүлтүксүз ташып чыгууга багытталган.
Салык кызматынан белгилешкендей, электрондук эсеп-фактура товарга менчик укукту өткөрбөстөн, Евразия экономикалык бирлигине мүчө мамлекеттерге товарларды ташып чыгууда коштомо документ катары таризделет жана салыктык милдеттенмелерди жаратпай тургандыгы баса белгиленди.
Ошондой эле инспекторлор сатуучунун эсебине акча түшкөндө, бирдиктүү эсеп-фактураны отчеттук айдан кийинки айдын 10 иш күнүнөн кечиктирбестен электрондук түрдө тариздөө керектигин эскертти.
Салык кызматы салык сабаттуулугун жогорулатуу жана салык мыйзамдарын туура колдонуу максатында мындай түшүндүрүү иштерин жана окутуу семинарларын туруктуу негизде өткөрүп турат.
