Милдеттүү медициналык камсыздандыруу фонду 390 млн сомду мыйзамсыз жумшаган
Милдеттүү медициналык камсыздандыруу фонду (ММК фонду) 2020-жылы 390 млн сомду максатсыз жумшаган. Бул жүргүзүлгөн аудиттин жыйынтыгында аныкталганын бүгүн, 24-февралда Жогорку Кеңештин жыйынында Эсептөө палатасынын төрагасы Алмаз Акматов билдирди.
Эсептөө палатасы бул каржылык бузуулар 2020-жылы пандемия учурунда болгонун жана каражаттар максатсыз пайдаланылганын белгиледи.
«Жалпысынан каржылык бузуулар 390 млн сом болгон. Анын ичинен финансылык каржы бузуулар 37.3 млн сомду түзгөн, анын ичинде жетишпестиктер, эмгек акысын негизсиз төлөөлөр бар. Ошондой эле 226.7 млн сом бюджеттин резервдери жана жоготуулары аныкталган, рационалдуу эмес пайдаланылган каражаттар 127.4 млн сомду түзгөн», – деди Акматов.
Депутат Айбек Осмонов учурда канчасы калыбына келтирилгени тууралуу сурады. Акматов ар бири өзүнүн беренелери боюнча калыбына келтирип жатышканын белгилеп, эсептөө палатасынын аудитинин жыйынтыгы боюнча алды 60%дан аркасы 5%дан төлөгөнүн билдирди.
«Материалдык баалуулуктардын жетишпестиги боюнча 2.5 млн сом аныкталган, калыбына келтирилгени болгону 222 миң гана сомду түзгөн, бул 10%дын гана тегерегинде. Аткарылышы бүгүнкү күнгө карата жакшы эмес. Баарына жазма буйруктар берилген, эгер төлөбөсө органдарга өткөрүлүп берилет», – деди Эсептөө палатасынын төрагасы.
Белгилей кетсек, жыйында «КРнын өкмөтүнө караштуу Милдеттүү медициналык камсыздандыруу фондунун 2020-жыл үчүн бюджетинин аткарылышы жөнүндө отчетту бекитүү тууралуу» мыйзам долбоору каралууда.
