Экономика министрлиги коомдук тамактануу жайлары үчүн бирдиктүү салыктын ставкасын төмөндөтүүгө макул

Коомдук тамактануу ишканалары жана Экономика министрлиги бирдиктүү салыктын ставкасынын өлчөмү боюнча жумушчу топ түзүшөт. Бул тууралуу «Бизнес жаңы Салык кодексинин шарттарында: тирүү калуу!» деп аталган тегерек столдо рестораторлор жана мейманканачылар Ассоциациясынын президенти Евгений Тян билдирди.

Анын айтымында, бийлик мурда айткан ставкалардан акырын түшүүдө, бирок ошондо деле 6%дык көрсөткүч бул тармакка терс таасирин тийгизет.

«ХоРеКа клуб Ассоциациясынын» директору Гүлзат Райымбекова коомдук тамактануу базарына өгөй мамиле жасалып жатканын белгиледи.

«Баары эле ачык, таза иштейт деп айткандан алыспыз. Ооба, бизде мындай ишканалар бар экендигин да мойнубузга алабыз. Бирок бир консенсуска жетүү үчүн экономикалык сапаттуу негиз керек. Өткөн жылдарга карасак, биз салыктык келишимдин негизинде иштегенибизде 2%дык ставка бар болчу. Салык кызматы үчүн бул көрсөткүч 6.3%ды түзгөн. Ошондуктан Экономика министрлиги сандарды төмөндөтүүгө макул», – деди ал.

Райымбекова базар көмүскөдөн чыгып, салык төлөөгө даяр экенин, бирок жеткиликтүү сандар керектигин, эгерде ошондой эле ишкерлер көтөрө алгыс жогору пайыз бойдон кала турган болсо (жаңы Салык кодексинде 8% – ред.), көптөгөн ишканалар жабылаарын баса белгиледи.

Ал ошондой эле Экономика министрлиги менен коомдук тамактануу тармагында сандар боюнча пикир келишпестиктер бар экенин, бирдиктүү салыктын ставкасы чыдай албагыдай жогору экенин далилдеш үчүн ишканалар хронометраж жүргүзүүгө даяр экенин кошумчалады.

• Белгилей кетсек, тегерек стол  Economist.kg басылмасы тарабынан уюштурулган.