Күйүүчү май дагы кымбаттайт – келишимдер доллар менен түзүлгөн
Кыргызстандын Нефтетрейдерлер ассоциациясынын жетекчиси Канат Эшатов бүгүн, 9-мартта «Биринчи радионун» түз эфиринде доллардын көтөрүлүп жаткандыгына байланыштуу күйүүчү-майлоочу майлардын (КММ) баасы дагы кымбаттай турганын билдирди.
Анын айтымында, бул сомдун девальвациясына жана Россия менен импорттук келишимдер доллар менен түзүлгөнүнө байланыштуу болууда. Доллар акыркы эки жумада 14 сомго көтөрүлүп, бул өз кезегинде күйүүчү майдын кымбатташына алып келген.
«Доллардын бир сомго көтөрүлүшү бир литр бензиндин баасынын 60 тыйынга кымбатташына алып келет», – деди Эшатов.
Нефтетрейдерлер ассоциациясынын жетекчиси жазгы талаа жумуштарына быйыл 100 тонна КММ керек экендигин жа ал көлөм жетиштүү экенин, ал мурда эле алынып келингенин да кошумчалап өттү.
Белгилей кетсек, Кыргызстан бир жылда 1.4 млн тонна күйүүчү май керектейт.
