Улуттук банктын төрагасы парламентке келсин, доллар 100 сомдон ашып кетти – депутат

Бүгүн, 10-мартта Жогорку Кеңештин жыйынында депутат Айбек Осмонов Улуттук банктын төрагасын парламентке чакырууну сунуштады.

Депутат азык-түлүк кымбаттап жатканын айтып, аткаруу бийлигинин өкүлдөрүн жана резервдик фонддун өкүлдөрүн да чакыруу керектигин айтты.

«Дүйнөдө баары кымбаттап жатат, бирок Кыргызстанда азык -түлүк өзгөчө кымбаттап кетти. Улуттук банктын төрагасын чакырсаңыздар, доллардын баасы 100 сомдон ашып кетти. Аткаруу байлиги келип, кризистен чыгуу жолдорун айтып берсин», – деди Осмонов.

Ал эми депутат Тазабек Икрамов да доллардын курсунун кескин көтөрүлүшүнө тынчсыздануусун билдирип, доллар менен насыя алган ишкерлер көп экенин белгиледи. Ал экономикалык каатчылыкка байланыштуу бардык коңшу өлкөлөрдө Антикризистик программалар кабыл алынганын, Кыргызстан да тез арада тийиштүү программалык документти кабыл алышы керектигин айтты.

Белгилей кетсек, Кыргызстанда бүгүн, 10-мартта саат 11.40га карата доллардын курсу 106.3 сомго көтөрүлдү.