Министрлер кабинети 9 га жерди «Кыргыз Петролеум Компаниге» 49 жылга берүү боюнча билдирүү жасады
Министрлер кабинети 9 га жерди «Кыргыз Петролеум Компаниге» 49 жылга акысыз пайдаланууга берүү мүмкүндүгү боюнча билдирүү жасады.
Кабинеттин берген маалыматына таянсак, аталган жер тилкеси «Кыргыз Петролеум Компани» ЖАКтын нефтини кайра иштетүүчү заводунун өндүрүшүн модернизациялоодо пайдаланылат.
Economist.kg буга чейин маалымдагандай, Экономика министрлиги Жалал-Абад шаарындагы жер тилкесин «Кыргыз Петролеум Компани» ЖАКына 49 жылга бекер пайдаланууга берүүнү сунуштаган. Аталган токтомдун долбоору Министрлер кабинетинин сайтында жарыяланган болчу.
Белгилей кетсек, «Кыргыз Петролеум Компани» «Кыргызнефтегаз» ААКтын (мамлекеттик үлүшү 85%) туунду ишканасы болуп саналат. Улуттук коопсуздук боюнча мамлекеттик комитеттин (УКМК) башчысы Камчыбек Ташиевдин жээни Байгазы Матисаков «Кыргыз Петролеум Компани» ишканасынын директору болуп иш алпарат.
Бүгүнкү күндө «Кыргыз Петролеум Компани» ЖАК жана «Элдик» мамлекеттик ишканасынын ортосунда аталган жер тилкесине мөөнөтү 10 жылга узак мөөнөттүү ижара келишими түзүлгөн.
