«Чакан ГЭС» ААК гидроэлектростанцияларды модернизациялоого ЕРӨБдөн 18.5 млн евро алат
«Чакан ГЭС» ААК Европа реконструкциялоо жана өнүктүрүү банкы (ЕРӨБ) менен алдын ала каржылоого макулдашты. Бул тууралуу мекеменин маалымат кызматы кабарлады.
Долбоордун алкагында «Чакан ГЭС» ААК курамындагы гидроэлектростанцияларды: Лебединовка ГЭСи, ГЭС-1, ГЭС-2 жана кичи Аламедин ГЭСин модернизациялоо макулдашылган. Ошону менен бирге, макулдашуунун алкагында техникалык-экономикалык негиздеме түзүү каралган.
«Долбоорго ЕРӨБдөн болжолдуу түрдө 18.5 млн еврого чейин инвестиция тартылышы күтүлүүдө. Анын ичинде, болжол менен жеңилдетилген насыя грант катарында 6.5 млн еврого чейин, модернизациялоо жана долбоорду ишке ашыруу боюнча иштер 12 млн евро деп каралган.
Бирок 6.5 млн еврого чейинки грант катарындагы каржылоо макулдашуудан кийин так билинет. Тагыраак айтканда, долбоорду ишке ашырууга керектеле турган жогорудагы алдын ала каражат техникалык-экономикалык негиздеме деталдуу түзүлгөндөн кийин билинет жана каржылоо жөнүндө макулдашууга кол коюлат.
Долбоордун мөөнөтү 15 жыл, 3 жыл жеңилдетилген мезгил, 12 жыл карыздын негизги өлчөмүн кайтаруу мезгили катары каралган», – деп айтылат маалыматта.
Бул долбоордун алкагында жогоруда айтылган ГЭСтердин гидротехникалык курулмаларын, имараттарын реконструкциялоо (оңдоо/калыбына келтирүү) жана көмөкчү гидромеханикалык жабдууларын модернизациялоо, электр жабдууларын жана башкаруу жана коргоо чынжырларын алмаштырууну иштери жүргүзүлмөкчү.
Долбоордун негизги максаты – гидроэлектростанциялардын ишенимдүү жана коопсуз иштешин камсыз кылуу, эксплуатациялык чыгымдарды 50%га азайтуу, станциялардын пайдалануу мөөнөтүн 35-40 жылга узартуу, кубаттуулукту 3.2 МВтга көбөйтүү пландалган.
Станциялардын суу агымын натыйжалуу пайдалануунун эсебинен электр энергиясын иштеп чыгуунун кошумча 20% өсүшү күтүлөт.
