Бишкек–2026: бюджеттин киреше бөлүгү 32,9 млрд сомго болжолдонууда
Бүгүн Тунгуч театрында Бишкек шаарынын 2026-жылга карата бюджетинин долбоору боюнча коомдук угуу өткөрүлдү. Иш-чарага шаар тургундары, муниципалдык бийлик өкүлдөрү жана депутаттар катышты. бул тууралуу муниципалитеттен билдиришти.
Бишкек шаарынын мэринин биринчи орун басары Мирланбек Байгончоков акыркы беш жылда шаар бюджети үч эсеге өскөнүн белгилеп, 2025-жылы бир катар ири инфраструктуралык жана социалдык долбоорлор ишке ашырылганын айтты.
Финансы министрлигинин Бишкек финансы башкармалыгынын башчысы Руслан Садырбаевдин маалыматына ылайык, 2025-жылдын жыйынтыгында шаардын бюджеттик кирешеси 30,5 млрд сомду түзүп, план 103,8%га аткарылган. Ошондой эле шаардык инфраструктураны колдоо үчүн кошумча 2,9 млрд сом бөлүнгөн.
2026-жылга карата бюджеттин киреше бөлүгү 32,9 млрд сом өлчөмүндө болжолдонууда. Каражаттар жол-транспорт инфраструктурасын өнүктүрүүгө, инженердик тармактарды жакшыртууга, социалдык объектилерди капиталдык оңдоого, райондорду көрктөндүрүүгө жана жашылдандырууга багытталат.
Коомдук угуу учурунда шаар тургундары газдаштыруу, канализация, жол, транспорт жана социалдык объектилер боюнча суроолорун берип, муниципалдык кызматтар тарабынан жооптор берилди. Айтылган сунуштар тиешелүү мекемелерге тапшырма катары жолдонду.
