Жумуш издөөчү Job.kg сервиси өз ишин аяктайт – компанияны HeadHunter сатып алды
Job.kg кызматы Headhunter.kg менен бириккендигине байланыштуу ишин токтоткон. Бул тууралуу Economist.kg порталына HeadHunter (hh.ru) компаниясынын өкүлдөрү билдирди.
Буга чейин Job.kg жумуш издөө сервиси ушул жылдын 1-октябрынан тарта ишин токтотору белгилүү болгон. Бул рекрутинг долбоору 2004-жылы Larixon Jobs Network Урал холдинги тарабынан негизделген. 2018-жылы Hearst Shkulev Media басма үйү сайтты сатып алып, аны Zarplata.ru сервисине кошкон эле. Ошол убакта Job.kg сайтынын бир айлык аудиториясы 200 000 уникалдуу кирүүлөрдү түзгөн.
2020-жылдын декабрында Headhunter кызматы Zarplata.ru сервисин 3.5 млрд рублга сатып алган. Job.kg расмий түрдө бул рекрутингдик компанияга өткөн, бирок 2015-жылдын июнь айында headhunter.kg сайтынын кыргызча версиясы ачылганына карабай ишин уланта берген.
Бүгүн, 9-июнда HeadHunter компаниясынын расмий билдирүүсүндө, Кыргызстанда бирдиктүү платформада сервисти мындан ары жайылтуу жана өнүктүрүү максатында Job.kg менен headhunter.kg сайттарын бириктирүү чечими кабыл алынган.
