«Манас» аэропортун жаңылоого 400 млн доллар алуу пландалууда

«Манас» аэропорту Борбор Азиядагы ири аймактык түйүнгө айланмакчы. Жалпысынан 400 млн доллардан кем эмес инвестиция тартып келүү пландалууда. Бул тууралуу МЖӨ борборунун директору Санжар Болотов журналисттер менен жолугушууда билдирди.

Маалым болгондой, учурда борбор «Манас» аэропортун модернизациялоо жана өнүктүрүү» МЖӨ долбоорун ишке ашыруунун үстүндө иштеп жатат.

Долбоорду ишке ашыруу үчүн эл аралык инвесторлор тартылат деп болжолдонууда. Макулдашуунун мөөнөтү бүткөнчө жүргүнчүлөрдүн саны кеминде 9 миллионго чейин көбөйөт. Учурда жүргүнчүлөрдүн агымы 2.1 млн адамды түзөт.

«Биз сапаттуу кызмат көрсөтүшүбүз керек, өткөрүү жөндөмдүүлүгү, терминалдар менен камсыз кылышыбыз керек. Аэропорт ансыз деле кирешелүү, бирок кирешени дагы бир нече эсе көбөйтсөк болот. Эң эле аз талабыбыз – бул конуу тилкесин толугу менен реконструкциялоо. Бизде учактар жетиштүү түрдө жумшак коно албайт жана туман каптаганда кыйынчылыктар болуп турат, ошондуктан биз көп нерсени жакшыртышыбыз керек», – деди Болотов.

Долбоордун жүрүшүндө төмөндөгү жумуштар жасалат:

·        учуу-конуу тилкесин толук реконструкциялоо;

·        эски жабдууларды заманбап жабдууларга алмаштыруу;

·        иштеп жаткан жүргүнчүлөр терминалын модернизациялоо жана жаңысын куруу;

·        жүк терминалын куруу;

·        аэропорттун ички инфраструктурасын жакшыртуу жана анын коопсуздугун жогорулатуу;

·        көп кабаттуу автопарк куруу.

Белгилеп кетсек, инвесторлор ачык сынак аркылуу тандалмакчы. Биринчи кезекте өнөктөштүн квалификациясы жана аэропортту башкаруудагы тажрыйбасы каралат.