Соода борборунан 36 млн сомдук зер буюмдарын алдап алып кеткендер кармалды
Свердлов райондук ички иштер башкармалыгы борбор калаада өзгөчө ири өлчөмдөгү алдамчылыкка шектүүлөр кармалганын билдирди. Маалыматка ылайык, 2025-жылдын 13-декабрында милицияга Т.А. аттуу жаран кайрылып, аз тааныш болгон Ч. жана Н. аттуу аялдарга карата чара көрүүнү өтүнгөн.
Билдирүүгө ылайык, соода борборлорунун биринде эки аял ишенимге кирип, алдоо жолу менен 36 млн сомдук зер буюмдарды сатыкка чыгаруу үчүн алып кетишкен. Кийинчерээк алар зер буюмдарды төмөн баада күрөөгө өткөрүп, белгиленген мөөнөттө акчасын кайтарбай, из жашырып кетишкен.
Аталган факты боюнча Свердлов райондук ички иштер башкармалыгынын тергөө кызматы тарабынан КР Кылмыш-жаза кодексинин "Алдамчылык" беренеси менен кылмыш иши козголгон.
Ыкчам-издөө иш-чараларынын жүрүшүндө 1985-жылы туулган Ш.Ч. жана 1988-жылы туулган С.Н. аттуу жарандар кармалып, Бишкек шаарынын ички иштер башкы башкармалыгынын убактылуу кармоочу жайына (ИВС) киргизилди.
