Кыргыз компаниялары Сеулда өткөн Import Goods Fair эл аралык көргөзмөсүнө катышышты
Кыргызстандын Корея Республикасындагы элчилиги Инвестициялар боюнча улуттук агенттик менен биргеликте 23-25-июнь күндөрү Сеулда өткөн эл аралык “Импорттук товарлар жарманкеси” көргөзмөсүнө кыргызстандык компаниялардын катышуусун уюштурду. Көргөзмө Кореянын Импортчулар ассоциациясы (КОИМА) тарабынан уюштурулган. Бул тууралуу Тышкы иштер министрлигинин маалымат кызматы билдирди.
Көргөзмөнү KOИMAнын президенти Бён Кван Ким Корея Республикасында аккредиттелген 40тан ашык дипломатиялык өкүлчүлүктөрдүн жетекчилеринин, ошондой эле 100дөн ашык чет өлкөлүк компаниялардын өкүлдөрүнүн катышуусунда ачты. Кыргызстандан Корея Республикасындагы элчи Аида Исмаилова жана кыргызстандык Bee Honey, «Тянь-Шань белектери», «Туруктуу бизнес чечимдери» (SBS), «ГИМНИЛИ», Bal King, «Азиус», «Афиат Трейд», «Балары», «Аман Гринфуд», «Сан Планет Органик» и NAG Group компаниялары катышты.
Көргөзмөгө бал, шоколад, варенье, кийиз буюмдар сыяктуу түрдүү ата мекендик продукция, ошондой эле Bayra мода үйүнүн текстиль буюмдары коюлду. Иш-чаранын катышуучулары кыргыз балынын даамын татып, боорсоктон ооз тийишти.
Маалымат үчүн: Жыл сайын өтүүчү Import Goods Fair көргөзмөсү чет мамлекеттик товарларды жана продукцияларды Кореяда көрсөтүү боюнча ири эл аралык көргөзмөлөрдүн бири болуп саналат.
