«Манас Ордонун» жетекчилиги 20 млн сомдон ашык каражатты коротуп салган
“Манас Ордо” улуттук комплексинин кызматкерлери 20.7 млн сомго жакын каражатты башка максаттарга жумшашкан. Бул тууралуу Башкы прокуратуранын басма сөз кызматы билдирди.
Маданият министрлигинин ички аудити одоно финансылык мыйзам бузууларды аныктады. Алсак, 2020-2021-жылдар үчүн аудитордук корутундуга ылайык, республикалык бюджеттин, ошондой эле мекеменин кызматкерлери үчүн атайын эсептин акчаларынан үстөк акылар, ашыкча эмгек өргүү акысы, эмгек стажы үчүн, жумуш ордун изилдөө отчету жок эле зыяндуулугу үчүн үстөк акылар негизсиз төлөнгөн.
Ошондой эле, тендердик сатып алууларда, электр энергиясын төлөөдө мыйзам бузуулар, президенттин резервдик фондунан бөлүнгөн жана демөөрчүлөр берген каражаттарды максатсыз пайдалангандыгы, «Манас Ордонун» муктаждыктары үчүн автоунаа сатып алынгандыгы аныкталган.
Бул факты боюнча Талас облусунун прокуратурасы тарабынан КР Кылмыш-жаза кодексинин 337-беренеси (Кызматтык абалынан кыянаттык менен пайдалануу) боюнча кылмыш иши козголгон. Учурда тергөө иштери жүрүп жатат.
