“Ала-Арча” жаратылыш паркында асма жолдун ачылышы болду
Бүгүн, 18-февралда КРнын Президенти Садыр Жапаровдун катышуусунда “Ала-Арча” жаратылыш паркында гондоль тибиндеги асма жолдун ачылыш аземи болду.
Анын жүрүшүндө өлкө башчы, акыркы жылдары мамлекет тарабынан “Ала-Арча” жаратылыш паркындагы инфратүзүм толугу менен жаңыланып, туристтер үчүн заманбап жана ыңгайлуу шарттар түзүлүп жаткандыгын билдирди.
“Узундугу 1 чакырымды түзгөн, саатына миңге жакын адамды тоонун чокусуна жеткире ала турган бул асма жол – “Ала-Арчага” келген жарандар үчүн жаңы шарт, жаңы мүмкүнчүлүк. Аталган асма жол дүйнөгө белгилүү австриялык “Доппел майер” компаниясы тарабынан курулду. Учурда аталган компания Ысык-Көл облусунда курулуп жаткан “Ала-Тоо резорт” ири тоо-лыжа комплексинде да асма жолдорду салып жатышат. Биз бул асма жолду узартуунун экинчи этабы аркылуу “Ала-Арчаны” комплекстүү өнүктүрүүнү улантабыз” - деп билдирди президент.
С.Жапаровдун айтымында, экинчи этап көзөмөл-өткөрмө пунктунан башталып, жалпысы 12 чакырым аралыкты камтып, улуттук парктын эң кооз жана жетүүгө кыйын болгон аймактарына чейин барат. Ошону менен бирге, азыр заманбап родельбан курулуп жаткандыгы, мындан тышкары, бассейни менен заманбап беш жылдыздуу мейманкананы пайдаланууга берүү да каралып жаткандыгын айтты.
“Жүргүзүлгөн иштердин натыйжасында “Ала-Арча” жаратылыш паркынын кирешеси олуттуу өскөнүнө токтоло кетейин. Эгерде 2020-жылы парктын кирешеси 29 млн сомду түзсө, 2025-жылы бул көрсөткүч 262 млн сомдон ашты. Бул — киреше дээрлик 9 эсеге өстү дегенди билдирет. Бүгүнкү күндө ушул сыяктуу мамлекеттик мекемелерде накталай акча кабыл алынбайт, төлөмдөр электрондук форматта жүргүзүлөт” – деп билдирди мамлекет башчы.
Мындан сырткары, өлкө башчы күч түзүмдөрүнө кайрылып, “мамлекеттин өнүгүүсүнө салым кошуп жаткан ишкерлерди дайны жок эле кысымга албагыла, кокус кандайдыр бир кысым-басымдын четин угуп калсам, капа болбогула” – деп эскертти.
